Høgskulekurs i Bygdeturisme er gjennomført

Av: Roar Werner Vangsnes.

Bakgrunnen var eit samarbeid mellom Fylkesmannen i Sogn og Fjordane, Høgskulen i Sogn og Fjordane (HSF) og HANEN, der ein i 2005 la planane for eit høgskulekurs i bygdeturisme. På den tida var omgrepet Geoturisme sterkt på bana. Difor var det også kalla Bygdeturisme - ”geoturisme i praksis”.

Eit 10 studiepoeng kurs vart testa ut på reiselivsstudentane på høgskulen og etter eit par år vart det etablert som eit obligatorisk kurs for studentane. No har ein gått eit steg vidare med å tilby eit desentralisert bygdeturismekurs. På første uttestinga vart det med 10 ”pilotstudentar”, og der 9 av 10 vil ta eksamen 20. - 30. mai 2009.

Eit kursopplegg  for mange målgrupper

I utgangspunktet var det tenkt på tilbydarar innan bygdeturisme og gardsmat, men erfaringane viser at det er like relevant for t.d. folk som arbeider i førstelinetenesta i kommunane og på regionalt/nasjonalt nivå. Det vil også vera interessant for reiselivsmedarbeidarar i destinasjonane og for personar som har interesse for fagområdet.

Praktisk-teoretiske koplingar

 

Kursopplegget har vore testa ut i Sogn og Fjordane på 3 ulike stader; Kalvåg (på kysten), Jostedal (dal og fjell) og i Flåm (fjordlandskapet). Ein har nytta mange av verksemdene som er knytte til organisasjonen HANEN – tidlegare NBG, nettopp ved at mange av medlemsbedriftene sit med god fagkompetanse og har tileigna seg mange erfaringar i tillegg til å vera gode pedagogar. Det er også henta inn spisskompetanse på ei rekkje fagområdet både sentralt og regionalt.  

 

Nye samarbeidspartnarar

 

Kompetansesenter for Distriktsutvikling (KDU) har vore aktiv med i prosessen og i gjennomføringa av kurset. Spørsmålet er om denne type kurs kan gi grunnlag for liknande kurs i andre regionar med samarbeid mellom ulike høgskular og relevante fagmiljø. Ein viktig samarbeidspartnar er kompetansenava for mat som er lokalisert 5 stader i landet. På dette kurset vart det samarbeid med Kompetansenavet for mat i Aurland. Dei har ein sterk matfagleg kompetanse, og her ligg det eit spennande samarbeidspotensiale som bør utnyttast vidare. Bygdeturismekurset er eit godt døme på korleis ein næringsorganisasjon har fått til eit samarbeid med ein FoU-institusjon, seier Anders Fitje v/ HSF og Ole Jonny Trangsrud v/ HANEN. Begge håpar at liknande kursopplegg kan halde fram, og studentane som har vore med vil vere med å gi innspel på vegen vidare. Det er også ein styrke at Innovasjon Noreg sentralt sin reiselivskompetanse er med som sensor i kurset.

Foto: Roar Werner Vangsnes.

8 av dei 9 første studentane i bygdeturismekurset er ferdige med siste samlinga og klar for eksamen. Her saman med dei kursansvarlege frå Høgskulen. F.v. Roar Moe, Solund, Roar Werner Vangsnes, KDU/HSF, Anders Fitje HSF, Frank Van den Ring, Solund, Jorunn Heggdal, Flåm, Rita Bergum, Malangen, Lars Aamodt, Modum, Siri Benjaminsen, Årdal, Trude Risnes, Leikanger og Anne Karin Hatling, Aurland.